دل بلال...

خدا امشو دلم مهلي گرهته

خدا دندون جگر لو دلمه کخته

خدا تا کی و دل لومه بکوزم

د هیچی وت نگم لومه بدوزم

قبول وت نيکنم بی گپ بشيني

که خرسل دل فقيره هی بويني

خدا هر چی دزه دورت جم وابی

زهونم لال خدا زورت کم وابي

دزي غارت و من سرچشمه وابی

دهاتل دومني لو تشنه وابی

خدا وابی شعاری سر زهونل

خدا وابی بلال شربه خونل

خدا سر میز قاضی رشوه وابی

و من چشمل زلیخا عشوه وابی

یقه بهسه ی که من حونت پلاسه

جلو کش تیر و طيفه ی اختلاسه

نشهسي و زيي تکيته بهلشت

بشر وابی و شر جي پا د نهلشت

خدا روزی سیاوش د کشتن

یه مشتی اجنبی ايلينه سهتن

خدا روزی حلاج دار ايزن

که حکم بی گناهی جار ايزن

خدا روزی که ایران گرهتن

چقد کشتن چقد بردن فرهتن

چقد او روز تجاوز خت د دييي

نگو من جر جلولا خت نبييي

خدا ای تخم تهله اوسه کاشتن

خشون ايگن که حکمی تی تو داشتن